۸صبح، کابل: د متحده عربي اماراتو د مرستو ادارې د کډوالو په چارو کې د ملګرو ملتونو له عالي کمېشنرۍ (UNHCR) سره د ۳ میلیون ډالرو په ارزښت هوکړهلیک لاسلیک کړی، څو هېواد ته د راستنو شویو نږدې ۳ زره افغانانو ته کورونه جوړ کړي.
د اماراتو خبري اژانس (وام) دوشنبه د لړم پر ۴مه، راپور ورکړی چې د دغه هوکړهلیک له مخې به د ۲ زره او ۹۵۰ افغانانو لپاره د دایمي کورونو د جوړولو لګښتونه برابر شي.
دغه کورونه به په کابل، هرات او کندوز ولایتونو کې جوړ شي او د اقلیمي بدلونونو پر وړاندې به مقاومت ولري.
دا هوکړهلیک د «AidEx ۲۰۲۶» په نوم د بشري مرستو او طبیعي پېښو پر مهال د مرستندویو فعالیتونو په غونډه کې اعلان شوی، چې د اکټوبر پر ۲۱مه او ۲۲مه په جنیوا کې جوړه شوې وه.
د دې پروګرام موخه راستنو شویو افغانانو ته د تلپاتې سرپناه برابرول او د هغوی د ژوند د بېرته رغولو په برخه کې مرسته کول بلل شوي دي.
دغه پروګرام په ځانګړې توګه د زیانګالونکو ښځو او ماشومانو پر ملاتړ تمرکز لري.
د متحده عربي اماراتو د مرستو ادارې ویلي چې دا طرحه د بشري ناورینونو له امله له زیانمنو شویو کسانو د ملاتړ او بېځایه شویو خلکو ته د تلپاتې حللارو برابرولو په موخه پلې کېږي.
