۸صبح، کابل: په افغانستان کې د ملګرو ملتونو د مرستندویه پلاوي دفتر یا یوناما خبر ورکړی چې سبا د افغانستان د وضعیت په تړاو د دغه سازمان د امنیت شورا غونډه پېلېږي.
دغه دفتر چهارشنبه د لیندۍ پر ۲۱مه په یو پېغام کې ویلي چې په دې غونډه کې به د ملګرو ملتونو د سرمنشي ځانګړې استازې او د يوناما مشره روزا اوتنبايوا وينا وکړي.
دا غونډه سبا د کابل پرمهال د ماښام ۷:۰۰ بجې پېلېږي.
له دې مخکې امنیت شورا په یو بیان کې ویلي و له رسمي غونډې وروسته به خبرې د بندو دروازو شاته وشي.
په بیان کې راغلي و: «په دې غونډه کې به د افغانستان لپاره د ملګرو ملتونو ځانګړې استازې او د یوناما مشره روزا اوتونبایوا، د افغانستان د بندیزونو کمېټې مشر په توګه د اکوادور سفیر اندرېس مونتالوو سوسا او د بشري مرستو د همغږيکوونکي دفتر «اوچا» یو چارواکی وینا وکړي.»
که څه هم تر اوسه د دې غونډې اجنډا نه ده څرګنده، خو په افغانستان کې د ملګرو ملتونو بېلابېلو بنسټونو د طالبانو له خوا د بشري ناورین د ناوړه کېدو او له بشري حقونو څخه د سرغړونې خبرداری ورکړی دی.
