۸صبح، کابل: د روغتیا نړیوال سازمان (WHO) د خوړو خوندیتوب په اړه سپارښتنو باندې ټینګار کړی او ویلې یې دي چې په ساده ګامونو د بوټولیزم او له دغې ناروغۍ د رامنځته کېدونکو پایلو مخنیوی کېدای شي.
نوموړي سازمان پنجشنبه د تلې پر ۲مه په اېکس پاڼه کې لیکلي چې د خوړو د خوندیتوب اصولو ته پاملرنه د انسانانو ژوند خوندي کوي.
د روغتیا نړیوال سازمان زیاته کړې چې د خوړو د خوندیتوب لپاره دې لاسونه او د پخلنځي توکي په سمه توګه ومینځل شي، شیدې دې ښې جوش شي او غوښه دې هم سمه پخه شي.
یاد بنسټ سپارښتنه کړې چې له کارونې مخکې دې ښیښو بوتلونه او کنسروي ډبي وکتل او خوراکي توکي دې په پاک او سوړ ځای کې وساتل شي.
د روغتیا نړیوال سازمان مخکې هم د خرابو یا په ناسم ډول ساتل شویو خوړو د خوړلو له امله د بوټولیزم ناروغۍ د اخته کېدو د خطر په اړه خبرداری ورکړی و.
نوموړي سازمان ویلي و چې «د معدې درد، کانګې، کمزوري، د لید تتوالی، په خبرو کې او ساه اخیستلو کې ستونزه» د دغې ناروغۍ نښې دي.
