۸صبح، کابل: د روغتیا د نړیوال سازمان (WHO) د نوې ارزونې له مخې، په ټوله نړۍ کې کابو ۱۵ میلیونه وګړي د کورونا ویروس له امله مړه شوي دي.
د دغه سازمان د اټکل پر بنسټ، د کورونا له امله د تلفاتو شمېر د ۲۰۲۰ کال د جنورۍ له لومړۍ د ۲۰۲۱ کال د ډسمبر تر ۳۱ پورې ۱۴٫۹ میلیون تنه وو، چې ۵۷ سلنه یې نارینه او ۴۳ سلنه ښځې وې.
په دغه شمېر کې هغه کسان شامل دي، چې په مستقیم ډول د کورونا له امله مړه شوي او نور ناروغان او ټپیان د کورونا د محدودیتونو او روغتیايي سیسټم د فشار له امله نه دي توانېدلي، چې روغتیايي سیسټم ته لاسرسی پیدا کړي.
د روغتیا نړیوال سازمان باوري دی، چې په ډېری هېوادونو کې د کورونا ویروس له امله د مړو شمېر د تلفاتو د واقعې شمېرو پر پرتله کم بلل شوی دی.
د دغه راپور له مخې، یوازې په هند کې د کورونا له امله ۴٫۵ میلیونه کسان مړه شوي، چې دا د رسمي شمېرو لس برابره دی، چې د کورونا ویروس د خپرېدو په بهیر کې ثبت او خپرې شوې وې.
د روغتیا نړیوال سازمان ویلي، چې د تلفاتو دا لوړ شمېر، له ساري ناروغیو سره د مبارزې د اړتیا تر څنګ په روغتیايي سیسټم کې د پانګونې لپاره د هېوادونو اړتیا ښيي.
