د پروان د کوویډ – ۱۹ د درملنې روغتون مسوولان په دغه ولایت کې پر کورونا ویروس د اخته کسانو د ۱۰۰ سلنه زیاتوالي خبر ورکوي. د هغوی په وینا، په تېره یوه میاشت کې په دغه روغتون کې د کوویډ – ۱۹ ناروغۍ کابو ۸۰ کسان بستر شوي دي. مسوولان زیاتوي، چې ښايي دا کسان پر کورونا اخته وي؛ خو تر اوسه په افغانستان کې د کورونا د اومیکرون بڼې د تشخیص کیټونه نشته.
پروان کې د کوویډ – ۱۹ روغتون مسوول عبدالحمید عالمي ژکفر په دغه ولایت کې په وروستیو اوونیو کې پر کورونا د اخته کسانو له زیاتوالي اندېښنه څرګندوي. د ژکفر په وینا، په تېرو ۲۵ ورځو کې، پروان کې پر کورونا د اخته کسانو په ۹۰۰ شکمنو بېلګو کې ۷۵ تر ۸۰ پېښې مثبتې دي. هغه زیاته کړه: «ښایي دا کسان به د کورونا پر نوې بڼه اخته وي؛ خو تر اوسه په افغانستان کې د اومیکرون د تشخیص کیټونه نشته. د عامې روغتیا چارواکو څو ځله د روغتیا له نړیوال سازمان څخه د کیټونه غوښتنه وکړه؛ خو د دغې بڼې له خپرېدو د څو میاشتو په تېرېدو سره، تر اوسه موږ ته د اومیکرون د تشیخص کیټونه نه دي راکړل شوي او دغه سازمان افغانستان ته پاملرنه نه کوي.»
هغه همداراز د کوویډ – ۱۹ روغتونونو ته د روغتیا نړیوال سازمان د اختصاصي بودیجې په درېدو اندېښنه څرګنده کړه او ویې ویل چې له همدې امله د دې روغتون روغتیایي کارکوونکي کم شوي دي.
د پروان د کوویډ – ۱۹ روغتون مسوولان د روغتیا له نړیوال سازمانه غواړي، چې ژر تر ژره د افغانستان روغتیایي سیسټم ستونزو ته پاملرنه وکړي.
د ویلو ده چې د «اومیکرون» په نامه د کورونا ویروس نوې بڼه په لومړي ځل د تېر زېږدیز کال د نومبر میاشتې په وروستیو کې په سویلي افریقا کې وپېژندل شوه.
په همدې حال کې، پروان کې یو شمېر ډاکتران وایي، چې پر دې بڼې د اخته کېدو نښې د مخکینو ډولونو په پرتله کمې دي؛ خو دغه ډول ناروغي ډېره چټکه او د اخته کسانو د شمېر د ډېرېدو لامل شوې ده. د پروان د کوویډ – ۱۹ روغتون یو ډاکتر انصارالله میرزایي له هېوادوالو غواړي، چې د کوویډ – ۱۹ ناروغۍ له نوي ډول څخه د مخنیوي لپاره دې د ګڼې ګوڼې ځایونو ته نه ورځي.
په دې لړ کې، یو شمېر هغه ناروغان چې په دې روغتون کې بستر دي، د ډاکترانو له ښه چلن او امکاناتو خوښ برېښي.
پر کورونا ویروس دوې اخته ښځې کفتر بېګم او سردار بي بي وایي، چې درې ورځې کېږي په دغه روغتون کې بستر دي. هغوی زیاتوي چې امکانات ورته برابر دي او تر څو چې روغتون ته نه وې راغلې، وضعیت یې ښه نه و.
د مسوولانو د شمېر له مخې، د کورونا ویروس د لومړۍ څپې له خپرېدو راهیسې درې زره او ۸۰۰ تنه پر دغه ویروس اخته شوي او په دوی کې ۹۲ تنه مړه او پاتې نور بېرته روغ شوي دي.
د پروان روغتیایي مسوولان د کیټونو له نشتوالي او د روغتیا له نړیوال سازمان څخه د کوویډ –۱۹ روغتون د بودیجې له درولو په داسې حال کې اندېښنه څرګندوي، چې د طالبانو له واکمنۍ وروسته، د هېواد روغتیایي سیسټم له سقوط سره مخ دی. د ژغورنې نړیوالې کمېټې څو میاشتې مخکې په یوه راپور کې ویلي و، چې ښایي د هېواد څه باندې ۹۰ سلنه روغتیایي کلینیکونه وتړل او میلیونونه تنه له لومړنیو روغتیايي خدماتو بې برخې شي.
د اومیکرون څپه په داسې حال کې افغانستان ګواښي، چې هېواد له سخت اقتصادي او بشري ناورین سره مخ دی. د مرستندویه بنسټونو په وینا، په هېواد کې تر ۲۰ میلیونه زیات کسان بېړنیو مرستو ته اړتیا لري. دغه بنسټونه پر چټکې مرستې رسونې په ټینګار، د ناورین د رامنځته کېدو په هکله خبرداری ورکوي.
