۸صبح، کابل: د ایران سیستان او بلوچستان ولایت د سرې میاشتې ټولنې ویلي چې په دغه ولایت کې د افغان کډوالو موټر له یوه بار وړونکي موټر سره ټکر کړی چې لامله یې ۱۱ افغانان مړه شوي دي.
د سیستان او بلوچستان ولایت د سرې میاشتې ټولنې اجرايي رییس سید محمدمهدي سجادي ایسنا خبري اژانس ته ویلي چې دا پېښه سهشنبه د تلې پر ۱۰مه د سروان – کوهک پر لویې لارې شوې ده.
د نوموړي په خبره، په پېښه کې ۱۴ کسان ټپيان شوي هم دي.
سجادي زیاته کړې: «هلال احمر ټولنې د ټیلري موټر د دوو سورلیو په ګډون ۱۲ کسانو ته لومړنۍ روغتیايي مرستې رسولې دي.»
د معلوماتو په حواله، دغو پناهغوښتونکو ایران ته په ناقانونه توګه د تګ تابیا لرله.
له دې وړاندې هم په ایران کې افغان کډوالو ته د ورته پېښو لامله مرګژوبله اوښتې ده.
پروسږکال د ایران په مشهد ښار کې د یوې ترافیکي پېښې په پاېله کې څلور افغانان مړه شوي وو.
