۸صبح، کابل: د ایران د بشري حقونو سازمان «ههنګاو» ویلي چې دغه هېواد په اصفهان زندان کې د یوه افغان په ګډون پنځه کسان په دار ځړولي دي.
نوموړي سازمان پنجشنبه د لړم پر لومړۍ راپور ورکړی چې ایران پرون ۴۰ کلنه سعیده خدادادي او ۲۹ کلن عبدالرضا غلامي اعدام کړي دي.
د راپور له مخې، خدادادي څلور کاله وړاندې د خپل مېړه د وژنې په تور نیول شوې او غلامي هم پنځه کاله وړاندې د عمدي وژنې په تور نیول شوی چې دواړه د ایران د قضايي بنسټ له خوا په اعدام محکوم شوي وو.
ههنګاو زیاته کړې چې له دې وړاندې دوه اصفهاني بندیان او یو افغان چې نوم یې «بشیر» ښودلی، په دار ځړول شوي دي.
د یادونې ده چې درې واړه له نشهيي توکو سره د اړوند جرم په تور محکوم وو.
دا په داسې حال کې ده چې د بشري حقونو دغه سازمان له دې مخکې راپور ورکړی و چې ایران د روان میلادي کال له پیله تر دې دمه د ۶۵ افغانانو په ګډون ۱۰۰۲ کسان اعدام کړي دي.
