۸صبح، کندهار: سیمهییزې سرچینې وايي چې د کندهار په ارغنداب ولسوالۍ کې د یو کس سوځېدلی جسد چې په وحشیانه ډول وژل شوی، موندل شوی دی.
سرچینو پنجشنبه د لړم پر ۲۱مه ۸صبح ورځپاڼې ته وویل چې ناڅرګندو کسانو لومړی د دغه کس سترګې ایستلي او وروسته یې جسد ورته سوځولی دی.
د سرچینو به خبره، د دغه کس مړی د چهارشنبې پر ورځ د ارغنداب ولسوالۍ اړوند په «شاه اغا» سیمه کې موندل شوی دی.
سرچینې وايي، له جسده ښکاري چې دا کس په تاوتریخجن ډول وژل شوی او وروسته یې د هویت د پټولو لپاره جسد ته اور اچولی دی.
د سرچینو په خبره، د جسد ترڅنګ هېڅ ډول نښه نه ده موندل شوې چې د وژل شوي کس هویت یا یې د اوسېدو ځای په ډاګه کړي.
تر اوسه د دغه کس د وژلو د انګیزې یا دا چې چا وژلی، معلومات نه شته.
سرچینې وايي چې په کندهار کې د ورته پېښو تکرار او د عاملانو نه نیول کېدو، د دغه ولایت د اوسېدونکو اندېښنې زیاتې کړې دي.
