۸صبح، کابل: د ملګرو ملتونو د بشردوستانه مرستو د همغږۍ دفتر (اوچا) وايي چې وچکالۍ او د اوبو کمښت په افغانستان کې د خلکو ژوند له ګڼو ننګونو سره مخ کړی دی.
دغه بنسټ پنجشنبه د لړم پر ۲۱مه په اېکس پاڼه کې لیکلي، هغه ټولنې چې د اقلیمي بحران په لومړۍ کرښه کې ژوند کوي، د دغه بحران په رامنځته کولو کې یې لږه ونډه لرلې، خو له پایلو یې ډېر زیان ګالي.
اوچا زیاته کړې چې د وچکالۍ دوام او اوبو ته د لاسرسي کمښت د کورنیو ورځنی ژوند او د عاید سرچینې له سخت فشار او د ژوندانه بنسټونه یې له ګواښ سره مخ کړې دي.
ملګرو ملتونو د اقلیمي بدلونونو لپاره د مالي سرچینو پر برابرولو ټینګار کړی او ویلي یې دي چې دا مرستې دې په عادلانه ډول تر زیانمنو ټولنو ورسېږي.
مخکې هم د ملګرو ملتونو دغه بنسټ د اقلیمي بحران له پایلو د افغانستان د زیانمننې په اړه خبرداری ورکړی دی.
