د افغانستان د ولسي جرګې یوه مخکینۍ غړې کابل کې په خپل کور کې ووژل شوه
۸صبح، کابل: کابل کې سرچینې وایي، چې په ولسي جرګه کې د کابل خلکو مخکینۍ استازې مرسل نبيزاده په خپل کور کې وژل شوې ده.
سرچینې وایي، چې اغلې نبيزاده شنبه شپه د مرغومي پر ۲۵ د کابل ښار په احمدشاه بابا مېنه کې په ډزو وژل شوې ده.
تر اوسه د مرسل نبيزاده د وژل کېدو د څرنګوالي په اړه کره معلومات نشته.
کابل کې د طالبانو د امنیه قوماندانۍ ویاند خالد ځدراڼ تایید کړې، چې اغلې نبيزاده په ډزو وژل شوې ده.
ویل کېږي، چې پر مرسل نبيزاده د ډزو په پایله کې د نوموړې ورور هم ټپي شوی دی.
د ویلو ده، چې په دې وروستیو کې د هېواد په بېلابېلو ولایتونو کې مرموزې وژنې زیاتې شوې دي. په ترټولو وروستي مورد کې تېره ورځ د پروان په مرکز کې یو کس په مرموز ډول ووژل شو.
