٨صبح ورځپانې ته د خوست سیمهییزو سرچینو رسېدلي اسناد ښيي چې د دغه ولایت د دولتي شیخ زاید پوهنتون د تازه اعلان شويو بستونو د ازموینې له شاخوا پنځه سوه ۴۳ ګډونوال څخه یوازې هغه کسان بریالي اعلان شوي چې د طالباني رژیم فورمې او د دغې ډلې غړيتوب او ملاتړ یې له ځان سره درلود.
د یادې ازموینې یو شمېر ګډونوالو له ٨صبح ورځپاڼې سره په خبره کې ویلی چې دې اعلان شویو بستونو کې هغه کسانو ته د بریالیتوب ځای ورکړل شوی چې د طالبانو فورمې درلودې او یا یې په تېرو وختونو کې له دغې ډلې سره همکارۍ کړې وي.
د دې ازموينې یو ګډونوال چې د موضوع د حساسیت له کبله د خپل نوم له اخیستو څخه ډډه کوي، وايي طالبانو په دې ازموینه کې هغه کسان بریالي اعلان کړي چې د دغې ډلې غړي، ملاتړي، همکاران او دوستان دي.
هغه وایي: « موږ یې هسې ستړي کړو چې دومره انتظار او زحمت مو د یادې ازموینې لپاره ویست. که دوی خپلو غړو ته په هره برخه کې لومړیتوب ورکوي، نو بیا دې خلکو ته تمې هم نه ورکوي چې خواري وکړي، بلکې له لومړیو دې د خپلو کسانو ليستونه پورته کوي او ولس ته دا ښایي چې نور موږ خپلو غړو بل چا ارزښت نه ورکوو.»
هغه زیاتوي:«داسې نه ده چې موږ یعنې ولس نه پوهېږي، زه اکثریت کسان پېژنم چې د دوی په واسطه او فورمه بریالي شوي او نور بې واسطې ځوانان ټول ناکام کړي دي. دا کار تصادفي نه دی شوی، بلکې قصدي او ښه په غور ترسره شوی دی.»
د خوست یو بل فعال ځوان احمدالله (مستعار نوم) چې د دې ازموینې ګډونوال دی، وايي دا ازموینه نه وه هسې د خلکو سترګو ته د خاورو شېندل و چې طالبان د ازموینې اخیستو له لارې له ملامتیا ځان خلاصوي.
هغه وایي: «بهتره خبره دا ده چې په دغه ورځ د ۵۴۳ ګډونوالو یوازې ساعت تير شو او وخت یې ضایع شو. بل یې هېڅ ګټه ورته ونه کړه.»
هغه زیاتوي: «طالبانو چې څوګ خوښ وي هغه به بریالي کېږي. طالبانو څخه زه یوه هیله کوم چې دوی له لومړیو خلک په واسطه او اړیکه ټاکي، نو بیا دې نور ځوانان په ګډون نه په تکلیفوي.»
د دې ازموینې یو بل ګډونوال له ٨صبح ورځپاڼې سره په خبرو کې وویل چې د ازموینې سوالونه له لومړیو بهر ته وتلي وو او د هغه په وینا، اکثریت یې د طالبانو لیکو غړي وو.
هغه وایي: «د امتحان څخه مخکي له مخکې نيم کسان د همدغه ازموینې په سوالونو له يو بل سره خبرې کولی يعني سوالونه مخکي له مخکي خپلو يارانو او د واسطو والا ته رسيدلي وو.»
بل پلو د یادې ازموینې ځینې ګډونوالو نجونو له ٨صبح ورځپاڼې سره په خبرو کې وویل چې طالبان له نجونو سره تضاد لري او دوی نه غواړي چې نجونې باسواده شي او په ټولنه کې پرمختګ وکړي.
مینه (مستعار نوم) چې د یادې ازموینې د «شیخ زاید پوهنتون د فوایدو مدیریت» اړوند بست ته یې نوم لیکنه کړې وه، وایي طالبانو پرته له کوم دلیله د یاد بست نجونې ناکامې کړي او په وینا یې، یوازې یوه نجلۍ یې کامیابه کړې ده.
هغه وایي: «ما څو شپې ورځې له حد زیاته مطالعه وکړه او شپې ورځې مې سبا کړې وې. پوره مطمینه وم چې خامخا به بریالۍ کېږم ځکه خپله هڅه راسره وه او خواري مې کړې وه، خو د ازموینې په صحنه کې د طالبانو چلند زما د بریا باور برعکس کړ او پوهه شوم چې دوی به کومې نجلۍ ته د بریا چانس ورنه کړي او دا دی له نتایجو وروسته یې اکثریت نجونې ناکامې کړې هم دي، یوازې یوه بریالۍ ده. زما شک په حقیقت بدل شو.»
بل پلو د خوست یو شمېر ځوانان چې په دې ازموینه کې یې د «اېم ډي ډاکټر» برخې اړوند یې ازموینه ورکړې، وایی طالبانو د دې برخې ټول ګډونوال ناکام کړي او هېڅ یو کس یې بریالی اعلان کړی نه دی. د دوی په وینا، په تېرو ازموینو کې هم همداسې ورسره شوې وو چې ټول یې یو له مخې نابریالي اعلان کړي وو.
د یادې برخې اړوند یو ځوان چې په ازموینه کې یې برخه اخیسته او د موضوع د حساسیت له کبله د نوم له اخیستو څخه ډډه کوي، وایی طالبانو د اېم ډي برخې ټول ګډونوال ناکام کړې دي.
هغه وایي: «د MD ډاکټرانو وخت یې ور ضایع کړی دی، ټول هم بې سواده نه و ورغلي، خو ټول یې له یو مخې ناکام اعلان کړي دي.»
هغه زیاتوي: «دا لومړی ځل نه دی په تېرو ازموینې کې یې هم دغه سې ورسره کړي وو، نو ولې بستونه اعلان ته سپاری چې څوک نه انتخابوئ.»
دا په داسې حال کې ده چې د طالبانو په راتګ دولتي بستونو یوازې د طالبانو په خوښه ځینې کسان انتخابېږي چې له دې کار څخه ولسی وګړو هم بار بار شکایتونه کړي دي.
