۸صبح، ننګرهار: یوې بهرنۍ موسسې هغه ښوونځی چې د ننګرهار په یوې ولسوالۍ کې د جګړو له امله تخریب شوی و، ورغاوه.
دغه ښوونځی چې د طالبانو او د مخکیني دولت ترمنځ په جګړو کې ويجاړ شوی و، د ۵ میلیون افغانیو په لګښت نن پنجشنبه د غویي په لومړۍ ګټې اخیستنې ته وسپارل شو.
دغه ښوونځی د ننګرهار په سپین غر ولسوالۍ کې د سویډن کمېټې له خوا ورغول شو.
د دغې کمېټې مسوولان ۸صبح ورځپاڼې ته وایي، چې دا ښوونځی په ټولو امکاناتو سره په ۴۳۰ متر مربع ځمکه کې له ۸ درسي ټولګیو، تشنابونو او لمریزې برېښنا سره رغول شوی دی.
د دغه ښوونځي په رغولو د کابو زرو زده کوونکو لپاره د روزنې د ځای ستونزه هواره شوې ده.
دا په داسې حال کې ده، چې د طالبانو، مخکیني دولت او نورو لوریو ترمنځ د تېرو څو کلونو په جګړو کې لسګونه ښوونځي ویجاړ شوي او زرګونه زده کوونکي له ښوونځیو پاتې شول.