۸صبح، ننګرهار: د ننګرهار ولایت د بټي کوټ ولسوالۍ اوسېدونکی عارف چې کلونه یې د ملي اردو په لیکو کې دنده ترسره کړې وه، کله چې د طالبانو له خوا مخکینی نظام سقوط شو هغه هم وطن پرېښود او بهر ته ولاړ. عارف منزل ته ونه رسېد او په رومانیا کې په یوه ترافیکي پېښه کې ومړ.
له اوږده ځنډ وروسته یې جنازه هغه کلي ته راوړل شوه چې څو میاشتې مخکې هغه روغ رمټ په کلکه اراده ترې روان شوی و.
د نوموړي د کورنۍ غړي ۸صبح ورځپانې ته وايي: «د بهر ته د تلو لپاره مو د پلار نیکه جدیداد ورته پلورلی او نور هم ډېر پوروړي شوي یوو.»
د هغه ورور زیاتوي چې د عارف مړی شاوخوا یوه نیمه میاشت وروسته ورته راوړل شوی دی.
د نوموړي د سفر یو ملګری ٨صبح ورځپانې ته د لارې د ستونزو او کړاوونو کیسه کوي، دغه کس په ټپي حالت ځان کور ته رارسولی دی.
نوموړی وایي: «تر ډېرو ورځو د لارې په اوږدو کې سره یو ځای وو خو بیا سره بېل شو هغه د ایران او ترکیې تر پولې راسره یو ځای و.»
د هغه په وینا، که د طالبانو چارسمبالی حکومت د ننه په هېواد کې خلکو ته د کار زمینه برابره کړي اړتیا نشته چې د نوموړي په شان ځوانان بهر د تلو لپاره زړه ښه کړي.
د عارف د کلي یو قومي مشر ۸صبح ورځپاڼې ته وايي: «د کلي کابو پنځوس ځوانان مو بهر ته چې یو شمېر لا تراوسه هم پر لاره دي تللي، مالومه نه ده چې روغ به منزل ته ورسېږي که نه.»
دغه قومي مشر وایي، خپلو ځوانانو ته ځکه بهر په مرګونو لارو د تلو اجازه ورکوي چې په هېواد کې مو کار نشته، خلک مجبور دي چې د اقتصادي ستونزو د اواري او کار پیدا کولو لپاره له هېواده بهر ته ولاړ شي او نور ملکونه آباد کړي.
دی وايي، ددغه کس په مړینې سره یې اندېښنه لازیاته شوې چې پر لاره پاتې کسان به منزل ته ورسېږي او که به له ورته برخلیک سره مخ شي.
د عارف په نوم ځوان پردي وطن ته پر لاره ژوند له لاسه ورکړی او مړی یې خپل کلي ته راوړل شوی، اوس یې جنازه په خپله پلرنۍ هدیره کې خاورو ته وسپارل شوه.
دا له هغو زرګونه افغان ځوانانو څخه یو دی چې په مخکیني نظام کې یې دنده ترسره کوله او اوس ځینې له وېرې او یو شمېر هم د اقتصادي ستونزو له امله هڅه کوي چې بهرنیو هېوادونو ته ولاړ شي او د خپلو کورنیو لپاره یوه نمړۍ ډوډۍ پيدا کړي.
په هېواد کې د مخکیني نظام له سقوط او د طالبانو د چارسمبالي حکومت په واکمنېدو سره له یوې خوا وزګاري زیاته شوه او له بله پلوه د خوراکي او نورو اړتیا وړ توکو بیې په بې مخینې توګه لوړې شوې چې دې چارې هېوادوال له سختې بې وزلۍ او لوږې سره مخ کړي دي.
که څه هم د طالبانو د چارسمبالي حکومت مسوولینو په ځلونو د مخکیني نظام پوځیانو د امنیت د خوندیتوب ډاډ ورکړی او بهر ته تللو هېوادوالو ته یې هم د راستنېدو بلنه ورکړې ده.