۸صبح، کابل: په کابل کې ځايي سرچینې وايي چې د دغه ولایت په سروبي ولسوالۍ کې د طالبانو یوه جنګيالي د یوې کورنۍ دوه غړي وژلي دي.
سرچینو سه شنبه د وږي پر ۳۱مه، له ۸صبح ورځپاڼې سره په خبرو کې وویل چې دا پېښه وروسته له هغې شوې چې د دغې کورنۍ ماشومانو او یوه طالب جنګيالي له یو بل سره شخړه کړې وه.
سرچینې زیاتوي چې له شخړې وروسته طالب جنګيالي د خپلو ماشومانو د ملاتړ په موخه پر دغو دوو ملکي کسانو ډزې کړې دي.
د سرچینو په وینا، د دې وژنې عامل په سروبي ولسوالۍ کې د طالبانو د ولسوال له نږدې کسانو دی او تر اوسه نه دی نیول شوی.
دا په داسې حال کې ده چې دوه ورځې وړاندې هم د کابل په دهسبز ولسوالۍ کې د ځمکې د ملکیت پر سر د رامنځته شوې شخړې له امله یوه طالب جنګيالي دوه وروڼه وژلي وو.
