۸صبح، کندهار: په کندهار کې ځايي سرچینې وايي چې د ترکیې د استخباراتو رییس ابراهیم کالین له هبتالله سره د لیدنې لپاره کندهار ته تللی دی.
سرچینو پنجشنبه د وږي پر ۲۶مه ۸صبح ورځپاڼې ته وویل چې هبتالله له دغه ترکي پلاوي سره د لیدنې ژمنه کړې وه، خو په وروستیو شېبو کې یې له لیدنې ډډه کړې ده.
سرچینو زیاته کړې چې وروسته د ترکیې د استخباراتو رییس په کندهار کې د طالبانو له والي ملا شیرین اخوند سره کتلي او نوموړي د هبتالله په استازولۍ له کالین سره خبرې کړې دي.
د سرچینو په خبره، دواړه له داعش او نورو ترهګرو ډلو سره پر مبارزې غږېدلې دي.
د یادونې ده چې د کندهار والي له دغه پلاوي سره د عمر په جامع جومات کې لیدنه کړې ده.
