۸صبح، بدخشان: د بدخشان سیمهییزو سرچینو د دغه ولایت په مرکز کې د یوې ۲۷ کلنې ښځې د ځانوژنې خبر ورکوي.
سرچینو سېشنبه د زمري پر ۲مه، ۸صبح ورځپاڼې ته ویلي چې دې ښځې تېره ورځ د دغه ولایت د مرکز فیضاباد ښار په دویمه ناحیه کې د زهرجنو موادو په خوړلو سره خپل ژوند ته د پای ټکی کېښود.
د سرچينو د معلوماتو پر بنسټ، دا ښځه مژګان نومېده او واده يې کړى و.
د سرچينو په خبره، تر اوسه د دغې کړنې انګيزه نه ده په ډاګه شوې.
طالب ځايي مسوولانو هم تر اوسه د دې پېښې په تړاو څه نه دي ويلي.
دا په داسې حال کې ده چې شاوخوا يوه مياشت دمخه هم په دغه ولايت کې يوې ۴۰ کلنې ښځې د کورنۍ ستونزې له کبله د موږک د وژنې موادو په خوړلو سره خپل ژوند پای ته ورساوه.
پر افغانستان د طالبانو واک ته له رسېدو وروسته د نجونو او ښځو ترمنځ ځانوژنې پېښې زیاتې شوې دي.
