عبدالله: له سولې وروسته حکومت د جزیاتو په اړه خبرې کول له وخته مخکې دي

د ملي روغې جوړې د عالي شورا رییس عبدالله عبدالله وايي چې په دغه شورا کې د طرحو د سمون په اړه کار روان دی او له سولې وروسته حکومت د جزیاتو په اړه خبرې کول له وخته وړاندې دي.
هغه د وري په شپاړسمه نېټه د افغانستان د ښځو د عدالت غوښتنې کمیټې له غړو سره په کتنه کې جوته کړه چې د غونډې پر اصلي غړو سربېره به د مېرمنو او مدني ټولنې استازي هم د جانبي غړو په توګه د استانبول په ناسته کې ګډون وکړي.
د ملي روغې جوړې د عالي شورا رییس د استانبول په غونډه کې د ښځو پر عادلانه او معنا لرونکي ګډون ټینګار وکړ.
د ښاغلي عبدالله په وینا، د وړاندیزي طرحې د برابرولو لپاره د نظریاتو پر سمون کار روان دی او ټاکل شوې د ملي روغې جوړې د عالي شورا د مشرتابه کمیټه د استانبول د غونډې لپاره پر څو اساسي اصولو کار وکړي.
هغه د ټولو لوریو د عادلانه او معنا لرونکي ګډون پر خوندیتوب په ټینګار سره جوته کړه چې تراوسه د راتلونکي حکومت پر جوړښت او څرنګوالي خبرې نه دي شوې.
له بلې خوا، د افغان مېرمنو د عدالت غوښتنې کمیټې غړو هم د سولې اړوندو ناستو کې د ښځو پر رول په ټینګار سره د استانبول په غونډه کې د ښځو د دېرش سلنه ونډې غوښتنه وکړه.
ددغې کمیټې د غړو په باور، هغه ښځې باید د سولې په ناستو کې ګډون وکړي چې د ټولو افغان مېرمنو په ښه توګه استازیتوب وکړي.
دغه مېرمنې د دوی د حقونو او لاس ته راوړنو په هکله د هر ډول معاملې په اړه د اندېښنې په څرګندولو سره زیاته کړه چې په راتلونکي حکومت کې باید ښځې پخواني وخت په شاتګ محکومې نه شي.