۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي چې په افغانستان کې د اوبو رسولو سیسټمونو په بیارغونې څه باندې ۳۹ زره ماشومانو او د کورنیو غړو یې د څښاک پاکو اوبو ته لاسرسی پیدا کړی دی.
نوموړي بنسټ پنجشنبه د تلې پر ۳۰مه راپور ورکړی چې دا پروژه د کوریا په مالي ملاتړ پلې شوې او موخه یې د اقلیمي بدلونو پر وړاندې له اغېزمنو سیمو سره مرسته ده.
یونیسف ویلي چې په دې پروژه کې ۱۹ ژورې څاه ګانې، په لمریزه برېښنا د اوبو د پمپاژ سیسټمونه، د اوبو زېرمه کولو ذخیرې او د اوبو د وېش شبکې جوړې یا بیارغول شوې دي.
د دغه سازمان په خبره، دا سیسټمونه له کورنیو، ښوونځيو او اغېزمنو سیمو سره مرسته کوی چې د وچکالۍ، سېلابونو او د اقلیمي بدلون له نورو پایلو سره د مقابلې لپاره د څښاک پاکو اوبو ته ډاډمن لاسرسی ولري.
دا په داسې حال کې ده چې په هېواد کې ګڼې سیمې په ځانګړې توګه لرې پرتې د څښاک پاکو اوبو ته اړین لاسرسی نه لري.
