۸صبح، کابل: د ایران د بهرنیو چارو وزیر حسین امیر عبداللهیان له خپل قطري سیال سره په لیدنه کې ویلي، چې هېواد یې چمتو دی ترڅو د افغان نجونو پرمخ د پوهنتونونو او ښوونځیو د بیا پرانیست او د زدهکړو د ارتقا لپاره لوجستیکي امکانات برابر کړي.
ایرنا خبري اژانس یکشنبه د سلواغې پر نهمه نېټه راپور ورکړی، چې د ایران د بهرنیو چارو وزیر له خپل قطري سیال سره په لیدنه کې د اوکراین او افغانستان د وروستیو بدلونونو په اړه خبرېاترې کړې دي.
عبداللهیان په دې لیدنه کې د طالبانو له خوا د ښځو پر زدهکړو بندیز لګول د اسلام له لارښوونو سره خلاف بللی او افغانستان کې د ښځو پرمخ د پوهنتونونو او ښوونځیو د بیا برانیست لپاره یې د مرستو په برخه کې د خپل هېواد د چمتوالي په اړه ویلي دي.
د ایران د بهرنیو چارو وزیر له دې مخکې هم افغانستان کې د ښځو پر زدهکړو بندیز د اسلامی اصولو خلاف بللی و.
دا په داسې حال کې ده، چې طالبانو تازه خصوصي پوهنتونونو او د لوړو زدهکړو موسسو ته د یوه مکتوب په لېږلو د دغو بنسټونو د کانکور په ازموینه کې د نجونو او ښځو ګډون منع کړ.