۸صبح، کابل: یو افغان چې د کاناډا له پولې په ناقانونه توګه امریکا ته تللی و، پر ۵۱ ورځو بند محکوم شوی دی.
د امریکا د نیویارک ایالت د شمالي حوزې د څارنوالۍ دفتر د دوشنبه د زمري پر ۲۶مه ویلي چې خان افضل احمدزی ۳۰ کلن او د کابل اوسېدونکی دی.
د دغه دفتر د خبرپاڼې له مخې، احمدزي د جون په درېیمه د نیویارک ایالت په شمپلین سیمه کې له نړیوالې پولې په پښو تېرېدو سره بې له دې چې د کډوالۍ او ګمرکي پلټنو بهیر ترسره کړي، د امریکا خاورې ته دننه شوی دی.
د څارنوالۍ دفتر په وینا، احمدزی امریکا ته له ننوتلو وروسته د دغه هېواد د سرحدي ګزمې د مامورانو له خوا نیول شوی دی.
احمدزي پر خپل جرم تر اعتراف وروسته په ۵۱ ورځو بند محکوم شوی او د بند مودې له تېرولو وروسته به له امریکا د هغه د اېستلو بهیر پیل شي.
په خبرپاڼه کې راغلي چې احمدزي تر دې وړاندې هم امریکا ته د ننوتلو هڅه کړې وه.
