۸صبح، کابل: افغان ایوک سازمان د ډونالډ ټرمپ حکومت هغه پرېکړه چې په ۲۰۲۶ مالي کال کې یې یوازې د ۷۵۰۰ پناه غوښتونکو د منلو محدودیت ټاکلی، په کلکو ټکو غندلې ده.
د افغان ایوک د مشرتابه پلاوي رییس شاون ونډایور شنبه د تلې پر ۱۲مه په یوه بیان کې ویلي چې دا ګام «د قانون ماتولو، د کانګرس او د امریکا ژمنو له پامه غورځولو» په څېر دی.
نوموړي ټینګار کړی چې په دې کمه برخه کې «هېڅ یا ډېر کم» هغه افغانان چې له امریکا سره یې همکاري کړې، شامل شوې نه دي.
د هغه په خبره، دا پرېکړه د هغو کسانو د پر ځای پرېښودلو په څېر ده چې په امریکا کې د پناه غوښتنې (P1 او P2) پروګرامونو ته ورپېژندل شوي وو؛ چې پکې وکیلان، څارنوالان، ښځينه قوماندانانې، خبریالان، مدني فعالان او ان د امریکايي نظامیانو کورنۍ شاملې دي.
ونډایور خبرداری ورکړی او ویلي یې دي: «د متحدانو پرېښودل د امریکا امنیت کمزوری کوي؛ د کارګرو پرمخ د دروازو تړل اقتصاد کمزوری کوي او د بشري رهبرۍ پرېښودل به په نړۍ کې د امریکا باور له منځه یوسي.»
نوموړي له سیاسي او سوداګریزو مشرانو او دغه راز له امریکايانو غوښتي چې د دې پرېکړې پر وړاندې چوپتیا غوره نه کړي.
هغه زیاته کړې: «افغان ایوک رامنځته شو ځکه امریکا هغو افغانانو ته چې د جګړې په ډګر کې راسره ودرېدل، ژمنه وکړه. موږ به اجازه ورنه کړو چې دا ژمنې په چوپتیا کې ماتې شي.»
د یادونې ده چې امریکا د ۲۰۲۱ کال په اګست میاشت کې له افغانستان څخه د خپلو ځواکونو له وتلو وروسته ژمنه کړې وه چې هغو زرګونو افغانانو ته پناه ورکوي چې په تېرو دوو لسیزو کې یې له دغه هېواد سره همکاري کړې ده.
د زرګونو ژباړونکو، د سفارتونو او امریکایي ادارو ځايي کارکوونکو، د بشري حقونو فعالانو، خبریالانو او مېرمنو ته چې له جدي ګواښ سره مخ وو، امریکا یا نورو درېیمو هېوادونو ته د انتقال لپاره ځانګړي پروګرامونه لکه SIV (د کډوالۍ ځانګړې ویزه) او P1 او P2 پیل شول.
ورته مهال، ځينې کسان چې قضیې یې روانې دي، لا هم په افغانستان یا ګاونډیو هېوادونو کې په تمه دي او ژوند یې له ګواښ سره مخ دی.
