۸صبح، کابل: نړیوالو رسنیو راپور ورکړی چې امریکا غواړي ۱۵۰ افغان کډوال د پاکستان له لارې افغانستان ته ستانه کړي.
رویټرز خبري اژانس جمعه د لړم پر ۸مه راپور ورکړی چې ټاکل شوې د دغو کسانو لومړۍ ډله د لړم پر ۱۱مه پاکستان ته ولېږدول شي.
د راپور له مخې، امریکايي حکومت دا کسان په لویزیانا ایالت کې نیولي دي.
د امریکا ولسمشر ډونالډ ټرمپ وايي د کډوالۍ د پالیسیو سختول او د کډوالو د ایستلو کمپاین د دغه هېواد د کورني امنیت د خوندیتوب په موخه ترسره کېږي.
په دغه راپور کې راغلي چې د دغو کډوالو ځينې یې پر افغانستان د طالبانو له واکمنېدو وروسته امریکا ته پناه وړې ده.
امریکا ته د لېږدول شویو افغانانو ملاتړي بنسټ «افغان اېواک» خبرداری ورکړی چې د دغو کسانو ایستل ښايي هغوی او کورنۍ یې له ګواښ سره مخ کړي.
نوموړي بنسټ د امریکا له کانګرسه غوښتي چې د افغانانو د لنډمهالي خوندیتوب لایحه تصویب کړي او د هغوی د ایستلو مخه ونیسي.
