۸صبح، کابل: وروسته له هغې چې د موبي ګروپ څښتن سعد محسني له طالبانو سره د نړیوالو د تعامل غوښتنه وکړه، په جلاوطنۍ کې افغان خبريالان وايي چې هغه بايد د طالبانو لپاره لابيګري ودروي.
په اروپا او امریکا کې جلاوطنه افغان خبریالانو دوشنبه د لیندۍ پر ۱۲مه په یوې خپره کړې اعلامیه کې ویلي چې سعد محسني د خپلو شخصي ګټو په موخه له طالبانو سره د تعامل هڅې کوي.
دا په داسې حال کې ده چې د طلوع ټلوېزیون او طلوع نیوز څښتن په دې وروستیو کې یوې استرالیايي رسنۍ ته ویلي، مخکې له دې چې افغانستان پر «شمالي کوریا» بدل شي، نړۍ باید له طالبانو سره رغنده تعامل پېل کړي.
محسني همداراز ویلي چې په دې کار سره ښايي طالبان د افغان ښځو ځيني له لاسه وتلي حقونه بېرته ورکړي.
هغه دا هم ویلي چې په وار وار یې هڅه کړې څو امریکايي چارواکي له طالبانو سره تعامل ته اړ کړي.
په جلاوطنۍ کې افغان خبريالانو د موبي ګروپ څښتن اقدامات شخصي ګټې بللي او له هغه يې غوښتي چې خپلې څرګندونې بېرته واخلي.
سعد محسني په داسې حال کې له طالبانو سره د نړۍ د تعامل غوښتنه کوي چې دغې ډلې تصویري رسنۍ د ژوندیو موجوداتو د تصویر د خپراوي له کبله له ګڼو ننګونو سره مخ کړې دي.
د موبی ګروپ څښتن له دې مخکې هم په افغانستان کې له طالبانو سره د نړیوالې ټولنې پر تعامل ټینګار کړی و.
