۸صبح، کابل: د «ټلوېزیون نړیوالې ورځې» په مناسبت د فعالانو اتحاد وايي چې طالبانو په تېرو درېیو کلونو کې د رسنیو په تړاو ډېر محدودوونکي فرمانونه صادر کړي دي.
د فعالانو اتحاد پنجشنبه د لیندۍ پر لومړۍ نېټه په یو خپاره کړي بیان کې ویلي چې دې فرمانونو ورځ تر بلې د مخکېنیو پرمختللو قوانینو پر ځاى د رسنيو په ځانګړې توګه د ټلوېزيونونو سانسور ډېر کړی دی.
د هغوی په وینا، طالبانو د خبریالانو پر وړاندې د شدیدو بندیزونو په لګولو او ګواښلو سره د بیان ازادي چې د ازادو رسنیو یو بنسټیز ارزښت دی، تر ډېره زیاته محدوده کړې ده.
په بیان کې راغلي دي: «دا ترهګره ډله (طالبان) د څارنې، سانسور او مستقیمې لاسوهنې له لارې د خپلې افراطي ایډیالوژۍ پر بنسټ د رسنیو محتوا بدلوي یا یې لېرې کوي.»
تېره ورځ د افغانستان خبریالانو مرکز ویلي و چې په تېر یو کال کې ۱۲ ټلوېزیوني شبکې د طالبانو په امر یا د دغې ډلې د محدودیتونو په پاېله کې بندې شوې دي.
د یادونې ده چې طالبانو د ژوندیو موجوداتو د انځورونو د خپراوي له کبله د یو شمېر ټلوېزیوني شبکو خپرونې بندې کړې دي.
