۸صبح، کابل: د افغانستان ځانګړی وجهي صندوق (STFA) وايي چې د دغه صندوق له خوا د کرنې، کارموندنې، کوچنیو سوداګریو او زیربناوو په برخو کې تمویل شویو پروژو په هېواد کې د بدلون او پرمختګ زمینه برابره کړې ده.
د افغانستان وجهي صندوق پنجشنبه د چنګاښ پر ۱۸مه راپور ورکړی چې په ۲۰۲۵ کال کې د دغه صندوق فعالیتونو د افغانستان په بېلابېلو سیمو کې د بدلون، تاب راوړلو، ګډون او پرمختګ لاره چاره برابره کړې ده.
دغه صندوق زیاته کړې چې د کرنې، د جامو تولید، د ښځو له خوا د مدیریت کېدونکو نانوایانو او د سیمهییزو سوداګریو د ملاتړ اړوند ځينې پروژې د هرات، خوست او پکتیا په ګډون په بېلابېلو ولایتونو کې پلې شوې دي.
نوموړي بنسټ په کندهار کې د ۳۶۵ مترو په اوږدوالي د یوه ډبرین کانال د جوړېدو خبر هم ورکړی دی.
یاد بنسټ ټينګار کړی چې له تمویل کوونکو، د ملګرو ملتونو له شریکانو او سیمهییزو خلکو سره همکارۍ د پراختیايي پروژو په پلي کولو او له افغانانو د ملاتړ په برخه کې مهمه ونډه لرلې ده.
