په تېرو درېیو ورځو کې د هېواد ۱۷ ولایتونه د اعتراضونو شاهدان وو، داسې اعتراضونو چې ظاهراً د یوه افراطي ډنمارکي- سویډني سیاستوال له خوا د قرآن کریم د نسخې د سوځولو له امله د خلکو ناخوښي ښيي. په سمنګان، بلخ او جوزجان ولایتونو کې یو شمېر لمونځ کوونکي وايي، چې طالب جنګیالیو د جمعې له لمانځه وروسته د سویډن پر ضد لاریون کې ګډون ته اړ کړي. د سرچينو په وينا، طالبانو پرلمونځ کوونکو د دغې ډلې بيرغ او ملاتړي شعارونه وېشلي او امر يې کړى، چې د سويډن پر هېواد لعنت ووايي او د طالبانو په ملاتړ غږ پورته کړي. هغه ويډيوګانې چې د ۸صبح ورځپاڼې لاسته ورغلي هم ښيي، چې لاریونوال د سویډن د حکومت پر ضد د مظاهرو پر ځای د طالبانو د رژیم په ملاتړ شعارونه ورکوي.
د بلخ ولايت د مرکز مزارشريف ښار يو تن اوسېدونکی حبيب الله له ۸صبح ورځپاڼې سره په خبرو کې وايي: «طالبانو د پنجشنبې په ورځ د مزارشريف ښار ټولو هټيوالو ته خبرداری ورکړی و چې د جمعې په ورځ د سهار له 10:00 بجو نه د ماسپښین تر 3:00 بجو پورې د هټيو د پرانېستو اجازه نه لري. حبيب الله زياتوي: « هغوی هټيوالو ته ويلي وو، چې که په لاريون کې ګډون ونه کړئ، د خپلو هټيو د پرانيستو حق به ونه لري.»
د مزارشريف ښار يو هټيوال عبدالکريم د جمعې په ورځ د سلواغې په ۷مه له ۸صبح ورځپاڼې سره په خبرو کې وايي، چې وسله والو طالبانو د جمعې له لمانځه وروسته لمونځ کوونکي او ځوانان د وسلې په زور له جوماتونو او کوڅو راټولول او په مظاهرو کې يې ګډون ته اړ کول. دغه هټیوال زیاتوي، چې طالب جنګیالیو د جمعې د لمانځه پر مهال د وکيلانو او د جوماتونو د استازو له لارې اعلان وکړ، چې له لمانځه وروسته دې په مظاهره کې ګډون وکړي، که نه نو د دې ډلې د امنیتي ادارو له لوري به له قانوني چلند سره مخ شي.
د سمنګان ولایت د مرکز ایبک اوسېدونکي هم ورته خبرې کوي. د ایبک ښار یو اوسېدونکی وايي، طالب جنګیالیو لمونځ کوونکو ته خبرداری ورکړ، چې که په مظاهره کې ګډون ونه کړي، له شرعي او قانوني چلند سره به مخ شي او بیا به د شکایت حق ونه لري.
د جوزجان ولایت د مرکز شبرغان ښار اوسېدونکي سید حمیدالله هم ۸صبح ورځپاڼې ته وايي، چې د امیر علي شیر نوايي جومات امام د جمعې د لمانځه په خطبه کې د طالبانو اعلامیه ولوستله او څرګنده یې کړه: «د جمعې له لمانځه وروسته ټول لمونځ کوونکي باید د سویډن پر ضد په مظاهره کې برخه واخلي. د پولیسو او د استخباراتو د مرکزي دفتر موټرونه به په مظاهره کې تاسې بدرګه کوي،که څوک په لاريون کې له ګډون سره مخالفت وکړي، د امنيه قوماندانۍ او کشفي ارګانونو ځواکونه يې نيسي او بيا د شکايت حق نه لري.»
دا هرڅه په داسې حال کې دي، چې ډنمارکي – سویډني افراطي سیاستوال راسموس پالودان د تېرې اونۍ په پیل کې د سویډن په پلازمېنه ستاکهولم کې د ترکیې د سفارت مخې ته د یوې مظاهرې پرمهال د سویډن د حکومت په اجازه د قران کریم یوه نسخه وسوځوله. د نوموړي دغه اقدام د ډېرو اسلامي هېوادونو له غبرګونونو سره مخ شو.
د نورو هېوادونو ترڅنګ د افغانستان ۱۷ ولایتونه په تېرو درېیو ورځو کې د مظاهرو شاهدان وو. خوست ولایت د چهار شنبې په ورځ د سلواغې په ۵مه، کندهار، پکتیا، کندز، ننګرهار، زابل او پکتیکا ولایتونه د پنجشنبې په ورځ د سلواغې په ۶مه او کابل، بلخ، بدخشان، پکتیا، سمنګان، جوزجان، بغلان، هرات، پنجشیر او هلمند ولایتونه د جمعې په ورځ د سلواغې په۷ مه د اعتراضيه لار يونونو شاهدان وو. په دغو لاريونونو کې ډيری لاريون کوونکو د سويډن د حکومت پر ضد د شعارونو د ورکولو ترڅنګ، د طالبانو په ملاتړ هم شعارونه ورکړي دي. د سرچينو د معلوماتو له مخې، دغه کار د طالبانو له لوري پر لاريونوالو تحميل شوی دی.
دا هرڅه په داسې حال کې دي، چې طالبانو تر دې وړاندې د ننګرهار او غزني ولایتونو اوسیدونکي اړ کړي چې په کابل کې د القاعده شبکې د مشر ایمن الظواهري پر کور د امریکا د هوايي برید پر ضد لاریون وکړي او د امریکا پر ضد یې شعارونه ورکړي. سرچینو په ډاګه کړې، چې طالب جنګیالي هم د لاریون کوونکو په منځ کې په شخصي جامو او اعتراضي بنرونو سره ګرځي او لاریونوال اړ کوي، چې د دې ډلې په ملاتړ هم شعارونه ورکړي.