۸صبح، کابل: په کابل کې سرچینې وايي چې ځینې ښځې د سړکونو پر غاړه په درېدو سره له شخصي موټر چلوونکو مالي مرسته غواړي او په ځینو مواردو کې دا غوښتنې له ګواښ او فشار سره ملې وي.
سرچینو سه شنبه د تلې پر ۷مه ۸صبح ورځپاڼې ته وویل چې دا ښځې لومړی د مالي ستونزو په یادولو او د وړیا لېږدولو په غوښتنې سره شخصي موټرو ته پورته کېږي او بیا د لارې په اوږدو کې له موټر چلوونکو پیسې غواړي.
یوه سرچینه وايي چې په خپله د کابل هوایي ډګر پر څلوېښت متره سړک له داسې یوې پېښې سره مخ شوې ده.
د سرچینې په وینا، دوې ۳۵ تر ۴۰ کلنې ښځې د سړک غاړې ته ولاړې وې او په زاریو یې ترې و غوښتل چې د وزیر محمد اکبر خان روغتون ته یې ورسوي.
هغوی ویلي وو چې ناروغ لري، بې له امکاناتو کابل ته راغلې دي او روغتون ته د تګ لپاره مرستې ته اړتیا لري.
دا سرچینه زیاتوي چې موټر ته د ښځو تر ختلو وروسته، هغوی د لارې په اوږدو کې ترې وغوښتل چې دوه زره افغانۍ ورکړي.
د سرچینې په وینا، دغو دوو ښځو ګواښ کړی چې د پیسو د نه ورکولو په صورت کې به طالبانو خبر کړي او ادعا به وکړي چې موټر چلوونکي پر دوی د تېري هڅه کړې ده.
سرچینه وايي چې د خپل پت او عزت د زیانمنېدو له وېرې مجبوره شوې چې غوښتل شوې پیسې ورکړي.
سرچینه همدا راز ادعا کوي چې دغو دوو ښځو ځانونه د طالبانو اړوند معرفي کړي او سخته یې ګواښلې ده.
