۸صبح، کابل: د افغانستان له رسنیو د ملاتړ سازمان (AMSO) ملګرو ملتونو او د بشري حقونو ملاتړو بنسټونو ته په یوه استول شوي لیک کې په پاکستان کې له افغان خبریالانو د ملاتړ او خوندیتوب غوښتنه کړې ده.
نوموړي سازمان چهارشنبه د لړم پر ۱۴مه په یوې خبرپاڼې کې لیکلي چې دا لیک د د ۳۰۰ افغان خبریالانو او رسنیزو کارکوونکو له خوا لاسلیک شوی دی.
په لیک کې د پاکستان له حکومته غوښتل شوي چې د افغان خبریالانو له نیولو او ایستلو لاس واخلي او د هغوی خوندیتوب ته اړین امنیتي تدابیر او قانوني ملاتړ برابر کړي.
پر نړیوالې ټولنې هم غږ شوی چې افغان خبریالانو ته د بشردوستانه ویزو، بیامېشتېدنې او بېړني ملاتړ بهیر چټکولو کې همکاري وکړي.
دا غوښتنه داسې مهال شوې چې د پاکستان پولیسو په دغه هېواد کې د مېشتو افغانانو په ځانګړې توګه د خبریالانو او مدني فعالانو د نیولو او ایستلو لړۍ چټکه کړې ده.
