۸صبح، کاپیسا: ځايي سرچينې په ايران کې د يوه افغان ځوان د وژنې خبر ورکوي.
سرچینو شنبه د وري پر ۱۱مه ۸صبح ورځپاڼې ته منلې چې دا ځوان د ایران د البرز ولایت په مرکز «کرج» کې د خپلو ملګرو له خوا د چړو پر ګوزارونو وژل شوی دی.
دا ځوان محمدصادق محمدي نومېده او د کاپيسا د کوهستان د دویمې حصې ولسوالۍ د «کالوته تاجیکهای» کلي اصلي اوسېدونکی و.
محمدصادق په دې وروستیو کې مراکش ته د سفر په موخه ایران ته تللی و.
د سرچينې د معلوماتو پر بنسټ، د محمدصادق څو ملګرو هغه د يوې مېلمستیا په پلمه خپلې کوټې ته رابللى او بيا يې د دوه زره امريکايي ډالرو او يو آیفون د غلا لپاره وژلی دی.
سرچینه زیاتوي چې د دې ځوان دوه ملګري د ایران پولیسو د هغه د وژنې په تور نیولي دي.
محمدصادق د البیروني پوهنتون د ژورنالیزم پوهنځي محصل و.
ټاکل شوې چې د محمدصادق مړی د روانې اوونۍ دوشنبې ورځ هېواد ته ولېږدول شي.
د تېر کال په تلې میاشتې کې هم د ایران په سویل کې یوه افغان کډوال په قصدي ډول د خپلو څو ملګرو له لوري سوځول شوی و.
