۸صبح، کابل: د بشري حقونو نړیوال بنسټ (IHRF) پر افغانستان د پاکستان د هوايي بریدونو له امله د ملکي وګړو د مرګ ژوبلی د راپورونو په اړه د باوري، رڼې او خپلواکې څېړنې غوښتنه کړې ده.
دغه بنسټ دوشنبه د وږي پر ۳۰مه، د ملکي وګړو د مرګ ژوبلې په اړه د اندېښنې په څرګندولو ویلي چې د بریدونو د موخو او د ملکي وګړو د مرګ ژوبلی په اړه ادعاوې دې په خپلواکه توګه وڅېړل شي.
د بشري حقونو نړیوال بنسټ ټینګار کړی چې افغان ملکي وګړي دې د بریدونو «جانبي زیان» نه ګڼل کېږي او د نړیوالو قوانینو پر رعایت، د ملکي وګړو د ژوند پر خوندیتوب او د هر ډول سرغړونې په تړاو پر حسابورکولو یې ټینګار کړی دی.
دغه بنسټ زیاته کړې چې د ترهګرۍ پر وړاندې د مبارزې اړوند ژمنې، د ملکي وګړو د ساتنې له بنسټيز مکلفیته څه نه کموي.
د بشري حقونو نړیوال بنسټ همداراز له پاکستان او افغانستانه غوښتي چې د کړکېچ د سملاسي کمولو لپاره ګامونه پورته کړي او ټینګار یې کړی چې د ملکي وګړو پر کړاوونو امنیت نه شي راتللی.
پاکستان پرون د پکتیکا پر برمل او د کونړ پر نورګل ولسوالیو هوايي بریدونه وکړل چې پکې درې ملکي وګړي وژل شوي او څلور نور ټپیان دي.
