د پاکستان پخواني ولسمشر عارف علوي په خیبر پښتونخوا ایالت کې د بېړني حالت اعلان د «ډیموکراسۍ پر تابوت وروستی مېخ» بللی دی.
علوي دوشنبه د اکټوبر پر ۱۲مه، پر ټولنیزه شبکه اېکس په یوه پیغام کې اسلاماباد د ډیموکراسۍ پر کمزوري کولو او د دغه ایالت د ټاکل شوي حکومت پر څنګ ته کولو تورن کړی دی.
د پاکستان پخواني ولسمشر د دغه هېواد حکومت او امنیتي ادارې هم د ټاکل شویو استازو په نیولو او شکنجه کولو، د خلکو په تښتولو او د سولهییزو لاریونونو په ځپلو تورنې کړي دي.
هغه ویلي دي: «یوازې د خیبر پښتونخوا خلکو حق درلود چې خپل حکومت لېرې کړي، نه هغو غیرمنتخبو غاصبانو چې په اسلاماباد کې د وسلو په زور تپل شوي دي.»
علوي ټینګار کړی چې د پاکستان تحریک انصاف ګوند او د دغه هېواد خلک به خپلې سولهییزې مبارزې ته دوام ورکړي او د ډیموکراتیکو لارو چارو له مخې به د خپل هېواد ساتنه وکړي.
دا په داسې حال کې ده چې د پاکستان فدرالي حکومت د یکشنبې په ورځ، د اکټوبر پر ۱۱مه، د دغه هېواد د ولسمشر اصف علي زرداري له تایید وروسته، په خیبر پښتونخوا کې بېړنی حالت اعلان کړ.
