د اسیا کپ په شل اوریزو کرېکټ سیالیو کې هند خپل سیال پاکستان ته د اوو ویکټو په توپیر ماتې ورکړه.
دا لوبه نن یکشنبه د سپټمبر پر ۱۴مه په دوبۍ کې وشوه.
د لوبې ټاس پاکستان وګاټه او لومړی یې د توپوهنې پرېکړه وکړه.
پاکستان په ټاکلو اورونو کې د نهو لوبغاړو په سوځېدو ۱۲۷ منډې وکړې او سیالې لوبډلې ته یې د ۱۲۸ اسانه هدف وټاکه.
هند بیا په خپلې پاڼۍ کې یاد هدف په ډېرې اسانۍ او یوازې د درېیو لوبغاړو په سوځېدو په شپاړسم اور کې پوره کړ.
په اسیا جام سياليو کې ټولې اته لوبډلې لوبېږي چې په دوو ګروپونو وېشل شوې دي.
په الف ګروپ کې هند، پاکستان، متحده عرب امارت او عمان دي. په ب ګروپ کې بیا افغانستان، بنګلهدېش، سریلانکا او هانگ کانگ له یو بل سره لوبېږي.
