هند د اسیا جام ۲۰ اوریزو کرېکټ سیالیو په پایلوبه کې پاکستان ته د پنځو ویکټو په توپیر ماتې ورکړه او د دغو سیالیو اتلولي یې په خپل نوم کړه.
دا لوبه نن یکشنبه د سپټمبر پر ۲۸مه په دوبۍ کې وشوه.
هند د لوبې پچه وګټله او سیالې لوبډلې ته یې د توپوهنې بلنه وکړه.
پاکستانۍ لوبډله په خپلې پاڼۍ کې ونه توانېده چې پوره اورونه ولوبوي او د ټولو لوبغاړو په زیان یې ۱۴۶ منډې جوړې کړې او هند ته یې د ۱۴۷ منډو هدف وټاکه.
په توپ وهنه کې د پاکستان لپاره ډېرې ۵۷ منډې صاحبزاده فرحان وکړې. دغه راز، فخرزمان ۴۶، سایم ایوب ۱۴ او پاتې نورو هر یوه له ۱۰ کمې منډې جوړې کړې.
د هند لپاره په توپ اچونه کې کولدیپ یادو ښه وځلېد او څلور پاکستاني لوبغاړي یې وسوځول. سربېره پر دې، جسپریت بومرا، ورون چکرورتي او اکسر پټېل هم دوه – دوه لوبغاړي اوټ کړل.
هند بیا د پاکستانۍ لوبډلې له خوا ورکړل شوی هدف د پنځو لوبغاړو په سوځېدو په وروستي اور کې پوره کړ.
د هند لپاره تېلک ورما ۶۹ ناسوځېدلې منډې، سنجو سمسون ۲۴ او شیوم دوبی ۳۳ منډې وکړې.
په توپ اچونه کې د پاکستان لپاره فهیم اشرف درې، شاهین شاه اپریدي او ابرار احمد یو – یو هندی لوبغاړی وسوځاوه.
د یادونې ده چې پاکستان په دې سیالیو کې درې ځلي له هند سره مخامخ شوی چې درې وارې یې سخته ماتې خوړلې ده.
افغان کرېکټ ملي لوبډله هم د دغو سیالیو برخه وه، خو په لومړي پړاو کې یې د دوو لوبو په بایللو او یوې لوبې په ګټلو له مخکې تګه پاتې شوه.
