۸صبح، کابل: د کرېکټ اتلانو جام (چمپینز ټرافۍ) ۵۰ اوریزو سیالیو په لړ کې افغان ملي لوبډلې سیالې انګلنډۍ لوبډلې ته د ۸ منډو په توپیر ماتې ورکړه.
دا لوبه نن چهارشنبه د کب پر ۸مه د پاکستان لاهور ښار په قذافي لوبغالي کې وشوه.
پچه یا ټاس افغان لوبډلمشر حشمتالله شهیدي وګاټه او لومړی یې د توپوهنې پرېکړه وکړه.
افغانستان د خپلو اوو لوبغاړو په زیان د ابراهیم ځدراڼ د ۱۷۷ منډو په مرسته سیالۍ لوبډلې ته د ۳۲۶ منډو موخه ورکړه.
دغه راز، د افغان لوبډلې په ګټه عظمتالله عمرزي ۴۱ او محمدنبي او حشمتالله شهیدي ۴۰ – ۴۰ منډې وکړې.
د انګلنډ لپاره جوفرا ارچر درې، لیام لیوینګسټون دوه او عادل رشید او جیمي اوورټون بیا یو – یو لوبغاړی وسوځاوه.
انګلنډۍ لوبډلې په خپلې پاڼۍ کې بیا د ټولو لوبغاړو په زیان ۳۱۷ منډې وکړې او نه توانېده چې ورکړل شوی هدف پوره کړي.
په توپ اچونه کې د افغانستان لپاره عظمتالله عمرزي له ټولو ډېر پنځه کسان وسوځول.
دغه راز، محمدنبي دوه، راشدخان، فضلحق فاروقي او ګلبدین نایب یو – یو لوبغاړی اوټ کړ.
افغان لوبډله د ګروپي سیالیو په لومړۍ لوبه کې له سوېلي افریقا سره مخامخ شوې وه چې له ماتې سره مخامخ شوه.
د ۲۰۲۵ کال د اتلانو جام سیالۍ د اتو لوبډلو ترمنځ په پاکستان او متحده عربي اماراتو کې کېږي.
په دې سیالیو کې افغانستان، پاکستان، بنګلهدېش، انګلستان، استرالیا، سوېلي افریقا، نیوزیلنډ او هند ګډون لري.
افغانستان به په ګروپي سیالیو کې خپله وروستۍ لوبه له استرالیا سره وکړي.
