۸صبح، خوست: طالبانو په خوست کې هټیوالو ته خبرداری ورکړی چې که د جمهوريت د پرځېدو د درېیمې کلیزې په مناسبت پر خپلو هټیو د دغې ډلې سپین بیرغ ونه لګوي، مجازات به شي.
سرچینو سېشنبه د زمري پر ۲۳مه ۸صبح ورځپاڼې ته ویلي چې طالبانو د دغه ولایت د رسنیو له ګواښ وروسته خلکو ته دا خبرداری ورکړی دی.
یو هټيوال وايي: «کار نشته. مونږ ټول په دې هیله ناست یو چې ښه پېردونکي راشي. طالبان مونږ اړ کوي چې بیرغ یې ولکوو او دا ورځ [زمري ۲۴مه] ولمانځو.»
د خوست ښار یو شمېر هټیوالو د طالبانو دا فرمان په اوسنیو شرایطو کې چې خلک له اقتصادي ستونزو سره لاس او ګرېوان دي، «ناعادلانه» بللی دی.
تر دې مخکې په خوست کې د طالبانو سیمهییزو مسوولانو د دغه ولایت رسنیو ته امر کړی و چې د افغانستان د سقوط د ورځې په مناسبت خپلې خپرونې دغې ډلې ته ځانګړې کړي.
همداراز طالبانو د دغه ولایت اوسېدونکو ته ویلي چې د زمري ۲۴مه د جمهوري نظام د پرځېدو درېیمه کلیزه په «شور او جذبو» سره ولمانځي.
د یادونې ده چې طالبانو سبا (چهارشنبه، زمري ۲۴مه) پر افغانستان د دغې ډلې واک ته د رسېدو په مناسبت عمومي رخصتي اعلان کړې ده.
دا په داسې حال کې ده چې تېر کال هم طالبانو د هېواد په بېلابېلو ښارونو کې هټیوالو ته امر کړی و څو د دغې ډلې په لاس د افغانستان د پرځېدو د کلیزې په مناسبت پر خپلو هټیو د دغې ډلې سپین بیرغ ولګوي.
