۸صبح، کابل: په افغانستان کې د ایران نوی سفیر عليرضا بېکدلي وايي چې افغانان باید هڅه وکړي څو له قانوني لارو دغه هېواد ته سفر وکړي.
بېکدلي شنبه د لیندۍ پر ۱۰مه، کابل ته رسېدلی او دا څرګندونې یې په هوايي ډګر کې له رسنيو سره په خبرو کې مطرح کړې دي.
د هغه په وينا، هغه افغان کډوال چې په قانوني ډول ايران ته ځي، د قدر وړ دي او درناوى به يې وشي.
نوموړي زیاته کړې ده: «…له دې کبله به هڅه وکړو چې په خپل هېواد کې د افغانانو حضور او همداراز د خلکو د تګراتګ موضوع تنظیم کړو او له دې موضوع څخه د اړیکو د ټینګښت لپاره د یو فرصت په توګه کار واخلو.»
د هغه د څرګندونو له مخې، په افغانستان کې د دغه هېواد سفارت په ګډون د ايران اسلامي جمهوريت د ماموريتونو تر ټولو مهم لومړيتوب د دواړو هېوادونو ترمنځ د ګاونډيتوب پراختيا ده.
د يادونې ده چې تېره اوونۍ حسن کاظمي قمي له خپلې دندې ګوښه او پر ځای يې عليرضا بېکدلي ګمارل شوی و.
بل خوا څو ورځې مخکې د ایران د کورنیو چارو وزیر سکندر مومني ویلي و چې هېواد یې نور د ناقانونه افغان کډوالو د منلو وړتیا نه لري او په وینا یې، د هغوی ایستل یې کاري لومړیتوب دی.
هغه ټینګار کړی و چې دا ګام د ایران له کار وزارت سره په همغږۍ اخیستل کېږي.
