۸صبح، کابل: د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بېنېټ ویلي چې هغو بنسټیزو لاملونو ته باید جدي پام وشي چې افغانان «ناهیلوونکو او خطرناکو» سفرونو ته اړ باسي.
بېنېټ شنبه د زمري پر ۱۰مه، پر خپله اېکسپاڼه کې د هغو ۱۹ افغانانو له کورنیو سره خواخوږي څرګنده کړه چې ایران ته پر قاچاقي لاره يې د تګ پر مهال د نیمروز په دښتو کې خپل ژوند له لاسه ورکړ.
هغه د ناقانونه کډوالۍ دې پېښې ته په اشارې سره، دا یوه بوږنوونکې او ټکان ورکوونکې غمیزه بللې ده.
تر دې وړاندې د کډوالۍ نړیوال سازمان (IOM) هم د قربانیانو له کورنیو او خپلوانو سره خواخوږي څرګنده کړې وه او ویلي یې وو چې د کډوالۍ په لارو کې د هر انسان مړینه یوه ژوره او دردناکه غمیزه ده.
بېوزلي، بېکاري او د مناسب ژوند د فرصتونو نشتوالی هغه مهم لاملونه دي چې ډېر افغانان د سختو او خطرناکو کډوالیو لارو ته اړ باسي؛ هغه لارې چې هر کال ګڼ افغانان پکې خپل ژوند له لاسه ورکوي.
