۸صبح، کابل: په کابل کې سرچینو خبر ورکړی چې د کابل د قرهباغ ولسوالۍ روغتون د ځانګړې پاملرنې له څانګې یو نوی زېږېدلی ماشوم ورک شوی دی.
سرچینو سهشنبه د تلې پر ۷مه ۸صبح ورځپاڼې ته وویل چې دا ماشوم د سیزارین (سياېس) عملیاتو په پایله کې زېږېدلی و، د روغتون د ځانګړې پاملرنې څانګې ته له لېږدولو وروسته ورک شوی دی.
سرچینې وايي چې ناڅرګندو کسانو دا نوی زېږېدلی ماشوم د روغتون د ځانګړې پاملرنې له څانګې له زېږېدو یوازې څو ساعته وروسته غلا کړی دی.
د سرچینو په خبره، د دغه ماشوم له ورکېدو وروسته یې د مور روغتیايي وضعیت خراب شوی دی.
تر اوسه د روغتون او اړوندې څانګې مسوولانو د پېښې د څرنګوالي په اړه څه نه دي ویلي.
