د امریکا ولسمشر جو بایډن د اسرائیلو له خوا د ایران پر اټومي تاسیساتو د برید پلان خطرناک بللی او ویلي دي چې له دغه بریده ملاتړ نه کوي.
نوموړي دا څرګندونې پنجشنبه د اکتوبر پر ۳مه پر اسرائیلو د ایران له توغندیز برید وروسته کړې دي.
بایډن یو ځل بیا له اسرائیلو خپل ملاتړ څرګند کړی او ویلي دي چې ایران ته دې د اسرائیل ځواب «متناسب» وي.
هغه زیاته کړې: «د ایران پر اټومي اډو برید به ټول منځني ختیځ ته ناوړې پاېلې ولري.»
د ایران له خوا پر تل ابیب د څه باندې ۱۸۰ توغندیو له توغولو وروسته، اسرائیل ګواښ کړی چې په ځواب کې به یې د ایران پوځي اډې په نښه کړي.
ایران دوه ورځې وړاندې پر اسرائیلو څه باندې ۱۸۰ توغندي وتوغول.
د ایران سپاه پاسداران ویلي چې دا توغندي یې د حماس سیاسي دفتر د مشر اسماعیل هنیه او د حزبالله ډلې د مشر حسن نصرالله د وژل کېدو په ځواب کې توغولي دي.
د اسرائیلو لومړي وزیر بنیامین نتانیاهو ویلي چې د ایران برید به ناوړې پاېلې ولري.
د یادونې ده چې په دې وروستیو کې د منځني ختیځ حالت کړکېچن دی.
