د غزې روغتیا وزارت اعلان کړی چې په تېرو ۲۴ ساعتونو کې د اسرائیلي بریدونو په پایله کې پنځه کسان وژل شوي او ۱۷ جسدونه له خاورو ایستل شوي دي.
الجزیرې شنبه د نومبر پر لومړۍ راپور ورکړی چې د دغه وزارت د بیان له مخې، د اسرائیل په دوه کلنه جګړه کې د غزې په تړانګه کې د وژل شویو کسانو ټول شمېر ۶۸ زرو او ۸۵۸ پورې رسېدلی او د ټپیانو هغه بیا ۱۷۰ زرو او ۶۶۴ ته پورته شوی دی.
د غزې روغتیا وزارت زیاته کړې: «لا هم ګڼ کسان تر کنډوالو لاندې دي او ځينې پر سړکونو پراته دي، ځکه تر اوسه امبولانس او مدني ډلې نه دي توانېدلي چې ویې مومي.»
په بیان کې راغلي چې د اکتوبر پر ۱۱مه له شوي اوربند سربېره هم د اسرائیلو په بریدونو کې ۲۲۶ فلسطیني وګړي وژل شوي، ۵۹۴ ټپیان او ۴۹۹ مړي له پراخو ویجاړیو را ایستل شوي دي.
د یادونې ده چې اسرائیل د اوربند له هوکړې وروسته هم خپلو مرګونو بریدونو ته دوام ورکړي او پرون یې د غزې تړانګې په ختیځ کې شجاعیه او تفاح سیمې بمبار کړې دي.
