۸صبح، کابل: د افغانستان لپاره د بریتانیا ځانګړي استازي ریچارډ لېنډسي کابل ته د سفر پر مهال د سیمهییزو ترینګلتیاوو پر کمولو، له ترهګرو ډلو سره پر مبارزې، د ښځو د حقونو پر رعایت او د ګډو ننګونو د اوارې لپاره د همکاریو پر پراختیا ټینګار کړی دی.
د بریتانیا سفارت پنجشنبه د تلې پر ۲۳مه په خپرې کړې خبرپاڼې کې ویلي چې لېنډسي په دې سفر کې له طالب چارواکو، د مدني ټولنې له استازو، د ښځو حقونو له فعالانو او خبریالانو سره لیدلي دي.
د خبرپاڼې له مخې، لېنډسي د اختلافونو د سولهییز اوارې او د ترینګلتیاوو د زیاتېدو د مخنیوي لپاره د عملي اقداماتو غوښتنه کړې او د پولو د مدیریت او بشري مرستو ته د لاسرسي د اسانتیاوو پر ارزښت یې ټینګار کړی دی.
نوموړي د افغانستان د امنیتي وضعیت او له ترهګرو ډلو سره د مبارزې پر اړتیا هم خبرې کړې او سیمهییز ثبات یې د افغانستان او سیمې هېوادونو د خلکو د امنیت او هوساینې لپاره مهم بللی دی.
د بریتانیا ځانګړي استازي له افغان ښځو، د مدني ټولنې له فعالانو او خبریالانو سره هم لیدلي او ویلي یې دي چې د افغانستان د باثباته او هوسا راتلونکي لپاره د ښځو او نجونو حقونه، امنیت او بشپړ مشارکت بنسټیز ارزښت لري.
لېنډسي ټینګار کړی چې بریتانیا له افغانانو ملاتړ ته ژمنه ده او د دواړو هېوادونو ترمنځ د ګډو موضوعاتو په اړه به تعاملاتو ته دوام ورکړي.
