۸صبح، کابل: د ملګرو ملتونو د ماشومانو د ملاتړ صندوق (یونیسف) خبرداری ورکړی چې په افغانستان کې شدیده خوارځواکي مخ په زیاتېدو ده او اټکل کېږي چې په ۲۰۲۷ کال کې به له څلور میلیونو ډېر ماشومان درملنې ته اړتیا ولري.
یونیسف پنجشنبه د تلې پر ۲۳مه په یوه راپور کې ویلي چې په افغانستان کې د هغو ولایتونو شمېر چې د خوارځواکۍ کړکېچن حالت لري، په ۲۰۲۵ کال کې له اوو څخه په ۲۰۲۶ کال کې ۱۰ ولایتونو ته لوړ شوی او اټکل کېږي چې په ۲۰۲۷ کال کې به ۱۴ ولایتونو ته ورسېږي.
د راپور پر بنسټ، ښايي په راتلونکي کال کې شاوخوا ۱.۹ میلیونه ماشومان د لوړې کچې پر شدیدې خوارځواکۍ او نږدې درې میلیونه نور د منځنۍ کچې پر خوارځواکۍ اخته شي.
همداراز، اټکل کېږي چې نږدې ۱.۳ میلیونه امیندوارې او شیدې ورکوونکې ښځې به هم له خوارځواکۍ سره مخ شي.
دغه بنسټ ویلي چې د خوړو کمښت، پاکو اوبو ته لږ لاسرسی، د مخنیوي وړ ناروغیو خپرېدل او د بودیجي نشتوالی هغه لاملونه دي چې دا کړکېچ لا پسې سختوي.
یونیسف خبرداری ورکړی چې له پولو د اړینو غذایي موادو د لېږد بهیر ګډوډېدو هم د مرستو رسولو بهیر له ستونزو سره مخ کړی او د ماشومانو درملنې ته یې لاسرسی ځنډولی دی.
