د کالیفورنیا په «پاسیفیک پالیسیډ» ځنګلونو کې د شدیدو بادونو له امله رامنځته شوې لویې اورلګېدنې زرګونه کسان د خپلو کورونو پرېښودو ته اړ کړي دي.
اسوشیټېډپرېس راپور ورکړی چې دا اورلګېدنه سهشنبه د جنورۍ پر ۸مه د لاس انجلس په لوېدیځ کې پر ځایي وخت ۱۰:۳۰ بجې رامنځته شوې ده.
د راپور پر بنسټ، دا اورلګېدنه د شدید توپان له امله رامنځته شوې ده.
په راپور کې راغلي چې د سیمې اوسېدونکو ته د اجباري تخلیې امر صادر شوی دی.
له دې اورلګېدنې وروسته، په کالیفورنیا کې چارواکو بېړنی وضعیت اعلان کړی دی.
د راپور له مخې، د دې اورلګېدنې له امله ۳۰ زره کسان د خپلو سیمو پرېښودو ته اړ شوي دي.
د لاس انجلس د اوروژنې ادارې چارواکو ویلي چې په سیمه کې شاوخوا ۱۳ زره استوګنیزې ودانۍ له ګواښ سره مخ دي.
راپورونه وايي چې د اور لمن نږدې یو زرو او ۲۰۰ هکتاره ځمکې ته غځېدلې ده.
د یادونې ده چې د امریکا په بېلابېلو ایالتونو کې وخت ناوخت د طبیعي پېښو له امله اورلګېدنې پېښېږي.
