د روسیې دفاع وزارت خبر ورکړی چې اوکرایین په تېرو ۲۴ ساعتونو کې خپل نږدې یو زرو ۱۷۵ سرتېري له لاسه ورکړي دي.
ټاس خبري اژانس یکشنبه د نومبر پر لومړۍ راپور ورکړی چې د روسیې دفاع وزارت په خپرې کړې اعلامیې کې په بېلابېلو محورونو کې د اوکراییني ځواکونو د تلفاتو شمېرې خپرې کړې دي.
د اعلامیې له مخې، د روسیې د «شمالي» پوځي ډلې ځواکونو تر ۱۹۰ اوکراییني سرتېري، «لوېدیځې» ډلې نږدې ۲۰۰ او «سویلي» ډلې څه باندې ۲۱۰ اوکراییني سرتېري وژلي دي.
د نوموړي وزارت په خبره، «مرکزي» ډلې تر ۳۵۰ پورې، «ختیځې» ډلې شاوخوا ۲۰۵ او د «دنیپر» ډلې نږدې ۲۰ اوکراییني سرتېري له منځه وړي دي.
د روسیې دفاع وزارت زیاته کړې چې د دغه هېواد ځواکونو په تېرو ۲۴ ساعتونو کې د اوکراییني پوځ له خوا کارېدونکي د انرژۍ او ترانسپورټ تاسیسات، د بېپیلوټه الوتکو د مونتاژ کارځایونه، د مهماتو زېرمې او د ځواکونو د لنډمهالي ځای پر ځای کېدو مرکزونه په نښه کړي دي.
دغه وزارت ویلي چې په تېرو ۲۴ ساعتونو کې د روسیې د هوايي دفاع سیسټمونو د اوکرایین ۳۹۱ ثابتوزرې بېپیلوټه الوتکې هم راغورځولې دي.
