۸صبح، کابل: د ملګرو ملتونو د ماشومانو د ملاتړ صندوق (یونیسف) وايي، سره له دې چې د پولیو پر وړاندې مبارزه کې د پام وړ پرمختګ شوی، لا هم په ټوله نړۍ کې زرګونه ماشومان د دې ناروغۍ له واکسینه بېبرخې دي.
دغه سازمان شنبه د اکټوبر پر ۲۴مه، ویلي چې جګړې، د روغتیايي نظامونو کمزورتیا او د بوديجې کمښت د پولیو د له منځه وړلو هڅې له ستونزو سره مخ کړې دي.
یونیسف زیاته کړې چې لېرې پرتو سیمو ته د لاسرسي ستونزې او د واکسینونو په اړه ناسم معلومات هم د ماشومانو د واکسینولو پر وړاندې خنډونه دي.
دغه سازمان ویلي چې افغانستان او پاکستان د نړۍ یوازیني هېوادونه دي چې پولیو لا هم پکې په بشپړه توګه له منځه نه ده تللې.
د یونیسف په وینا، له ۱۹۸۸ میلادي کال راهیسې د پولیو پر ناروغۍ د اخته ماشومانو شمېر ۹۹.۹ سلنه کم شوی، خو لا هم په ټوله نړۍ کې زرګونه ماشومان د دې ناروغۍ له واکسینه بېبرخې دي.
یونیسف زیاته کړې چې هر کال په ټوله نړۍ کې له ۴۰۰ میلیونو د زیاتو ماشومانو د واکسینولو په برخه کې مرسته کوي.
