تر دې وړاندې داسې رپوټونه خپاره شوي وو چې د چین دولت خپل یو شمېر تخنیکي کسان د طالبانو د استخباراتو د څارنې د وسایلو او سیسټمونو د ترمیم او تنظیم لپاره کابل ته لېږلي دي څو د هغو د کارندوالي کچه لوړه کړي. دغه کار د دواړو لورو په ګټه دی، له طالبانو سره مرسته کوي چې د جاسوسۍ په برخه کې د چین له مهارتونو ګټه پورته کړي او له چین سره مرسته کوي چې د طالبانو په استخباراتي دستګاه کې نفوذ ولري او اجازه ورنه کړي چې د طالبانو اړیکې له لوېدیځو استخباراتو سره د چین د حکومت له سترګو پټې شي. نن سبا ټول پوهېږي چې د قدرتونو تر منځ د جنګ او جګړې يو بنسټيز ډګر استخباراتي او جاسوسي جګړه ده او چين اجازه نه ورکوي چې په دې جګړه کې یې لوېديځ سيالان لږ تر لږه په ګاونډ کې برلاسي شي.
تر دې دمه دا د درک وړ ده. یو هېواد چې د یوې افراطي ډلې لاس ته لوېدلی او دا ډله له ډول ډول استخباراتي سازمانونو سره پر معاملو بوخته ده، چین هم ځان ته دا حق ورکوي چې لږ تر لږه د لوېدیځو استخباراتي سازمانونو په کچه ورسره په اړیکه کې وي، په ځانګړې توګه دې ته په پام سره، چې طالبان به په خپلې سختې استبدادي تګلارې سره په اوږدمهال کې د چین ستراتیژیک متحدین وي، که څه هم دوی په تاکتیکي توګه هڅه کوي چې د لوېدیځو هېوادونو باور خپل کړي او نورې پیسې ترلاسه کړي. د طالبانو په استخباراتي دستګاه کې ډېر افغان او غیر افغان عناصر شته چې له کلونو راهیسې له بېلابېلو استخباراتي سازمانونو سره اړیکې لري او اوس هم هغوی ته اطلاعات لېږدوي او په بدل کې یې د پام وړ پیسې او اسانتیاوې ترلاسه کوي. هغه واکمني چې د استخباراتو زېږنده وي، له دې پرته د بل څه تمه ترې نه شي کېدای، او دا لوبه دومره ژر پای ته نه رسېږي.
هغه څه چې د افغانانو لپاره د اندېښنې وړ دي، یو بل ګام دی چې د نویو خپرو شویو څېړنیزو رپوټونو له مخې د چین حکومت له طالبانو سره د همکارۍ په موخه اخیستی او هغه د ښارونو کچې ته د څارنې د ساحې غځول او د داسې دستګاوو نصبول دي چې کولای شي د هر یوه هېوادوال څېرې وپېژني او چلند یې ثبت کړي. د مصنوعي ځيرکتیا په زياتېدونکي پرمختګ سره چې هره ورځ یې کوي، ټول ترلاسه شوي معلومات د کوانټم کمپيوټرونو په مرسته چې کارول یې په پرمختللیو چينايي سازمانونو کې معمول دي، په اسانۍ سره تجزیه او تحليل کېداى شي او له دې لارې ان د انسانانو ذهن او روان هم لوستل کېدای شي. په دې وضعیت کې د خصوصي حریم په نوم څه نه پاتې کېږي او انسانان به په خپل داخلي خلوت کې هم یوازې نه وي. په واقعیت کې له دې لارې انسانان هک کېدای او د شیانو او وسایلو کچې ته راټیټېدای شي، هماغه کار چې د چین د وګړو په حق کې هم څه نه څه روان دی.
تر دې وړاندې د افغانستان خلکو د چین په اړه ښه تصویر درلود او هغه یې د یو داسې ګاونډي په توګه ګاڼه چې د افغانستان له کورنیو اختلافونو او شخړو ځان لیرې ساتي او نه غواړي چې د یوې ډلې په ګټه او د بلې ډلې په تاوان عمل وکړي. د چین دغه تګلاره چې د افغانانو په کورنیو چارو کې یې له لاسوهنې ډډه کوله، پر دغه ګاونډي د یو ډول باور او ترې د ډاډمنتیا لامل شوې وه. خو د دې تګلارې بدلېدل او له طالبانو سره د چین د دولت نېږدې کېدل او په ځانګړې توګه د هېوادوالو د زیاتېدونکي کنټرول په برخه کې له دغې ډلې سره مرسته، ښايي په لنډ مهال کې سیاسي ګټې ولري، خو په اوږد مهال کې د چین په تړاو د افغانانو ترمنځ د پراخې بې باورۍ لامل کېږي، چې یقیناً به د دواړو ګاونډیو هېوادونو لپاره به ناوړه پایلې ولري. سیاسي واکمنۍ ځي او ملتونه پاتې کېږي. د ګاونډیو هېوادونو تر منځ د اوږدمهالې دښمنۍ تخم باید د یو ملت له ځپونکو سره د مرستې په مټ ونه کرل شي.
