۸صبح، پروان: سیمهییزې سرچينې وايي چې په پروان کې د «ناڅرګندو وسلهوالو تر نوم لاندې، خو د طالبانو په جامو» کې کسانو د تېر حکومت د کورنيو چارو وزارت يو افسر په ډزو وژلی دی.
سرچینو ۸صبح ورځپاڼې ته منلې چې دا پخوانی سرتېری پنجشنبه د مرغومې پر ۶مه، د شپې شاوخوا ۹:۰۰ بجې د پروان ولایت د چاریکارو ولسوالۍ اړوند په «توغبیردي» کلي کې په ډزو وژل شوی دی.
د سرچينو د معلوماتو پر بنسټ، دا کس عبدالرحمن نومېده او ناڅرګندو وسلهوالو هغه مهال په ډزو وژلی چې د ماما له کوره خپل کور ته روان و.
عبدالرحمن د طالبانو له واکمنېدو وروسته د چاريکارو په نعمان لېسه کې د یو ښوونکي په توګه کار کاوه.
که څه هم د عبدالرحمن د وژنې عاملان د شپې تيارې له امله پېژندل شوي نه دي، خو د سیمې اوسېدونکي بیا طالبان په دې پېښه کې پر لاس لرلو تورنوي.
دوی ټینګار کړی چې له طالب جنګیالیو پرته د پروان په توغبیردي سیمه کې هېڅ وسلهوال حضور نه لري.
پر هېواد د طالبانو له واکمنېدو مخکې هم د چاريکارو ښار په توغبیردي کلي کې د دغې ډلې جنګياليو حضور درلود او وخت ناوخت به يې پخواني پوځيان په نښه کول.
د یادونې ده چې تېره شپه هم ناڅرګندو وسلهوالو په پروان ولایت کې دوه وروڼه وژلي وو.
