۸صبح، پروان: ځايي سرچینې خبر ورکوي چې طالبانو په پروان کې درې مخکېني سرتېري په ډزو وژلي دي.
سرچینو ۸صبح ورځپاڼې ته منلې چې طالب استخباراتو جمعه د سلواغې پر ۵مه، ماښام مهال د سېدخیلو ولسوالۍ له «چنکي» سیمې څخه درې مخکېني سرتېري نیولي او د هغوی مړي بیا تېره ورځ د کابل په قرهباغ ولسوالۍ کې موندل شوي دي.
دا کسان نورحمان، سېداکبر او عبدالحکیم نومېدل او د مخکېني دولت د کورنیو چارو وزارت سرتېري وو.
د سرچینو په وینا، طالب استخباراتو دا درې کسان په ډېر بېرحمانه ډول وژلي دي.
طالبانو تر اوسه په دې تړاو څه ویلي نه دي.
د یادونې ده چې طالبانو په تېرو درېیو کلونو کې د هېواد په ګڼو سیمو کې د بېلابېلو پلمو له مخې، سلګونه مخکېني سرتېري وژلي دي.
څه موده مخکې هم ډغې ډلې د بدخشان په بهارک ولسوالۍ کې د مخکېني دولت یو پوځي څارنوال په ډزو وژلی و.
