۸صبح، خوست: د خوست سیمهییزې سرچينې وايي چې په دغه ولايت کې یو مخکېني سرتېري د طالبانو له خوا تر دوامداره شکنجې او ځورونې وروسته ځانوژنه کړې ده.
سرچینو یکشنبه د مرغومې پر ۲مه، ۸صبح ورځپاڼې ته منلې چې دا مخکېنی سرتېری «غزني» نومېده او او د خوست د سپېرې ولسوالۍ د «سورکاح لاهوري» کلي اوسېدونکى و.
د سرچينې د معلوماتو پر بنسټ، طالبانو نوموړی سرتېری له ۲۰ ځلو ډېر بندي او شکنجه کړی و.
سرچینې وایي چې دې مخکېني سرتیري د طالبانو د «عمومي بخښنې» پر ادعا باور کړی و.
د سرچينې د معلوماتو له مخې، هغه څو ورځې مخکې هم د طالبانو له خوا نيول شوى و.
طالبانو تر اوسه په دې تړاو څه ویلي نه دي.
دا په داسې حال کې ده چې طالبانو دوه ورځې مخکې د پنجشېر د یو اوسېدونکي په ډزو لګېدلی جسد د هغه کورنۍ ته سپارلی و.
همداراز څو ورځې مخکې په کابل د اشرف غني ساتونکي د طالبانو له خوا د خپلې مېرمنې له نیول کېدو او د دغې ډلې د ځورونې له کبله ځانوژنه کړې وه.
د يادونې ده چې پر افغانستان د طالبانو له واکمنېدو وروسته دا ډله په بېلابېلو پلمو د پخواني دولت سرتېري شکنجه کوي او ان په ځینو مواردو کې یې وژني.
