په هېواد کې لومړی ځل ملت ته د حساب ور کولو لړۍ د ډاکټر اشرف غني تر ولسمشر کېدو وروسته را پيل شوه، د هغه جمهوري نظام مهال د ملت کور پارلمان موجود و، ور سره په خوا کې د مشرانو جرګه وه، د بیان مکمله ازادي وه، دې کار به پراخ رسنیز پوښښ اخیسته او تر ملته به د همدې رسنیو له لارې رسېده، د ملت هر وګړي دا حق درلود چې د دولت له هرې ادارې معلومات وغواړي او که ځواب يې نه وای ور کړی، نو د شکایت لپاره یو بل کمېسیون وجود درلود چې هغه ته په مراجعه کولو سره پر همدې دولتي اداره فشار راته چې ور کړل شوې پوښتنې ځواب کړي.
خو اوس طالبان هم ملت ته د ځواب ور کولو لړۍ مخته وړي. دلته ځينې پوښتنې را مطرح کېږي طالبان باید لومړی هغه پوښتنې ځواب کړي، بیا به دغه پروسه خدای خیر کړي.
تاسو چې ملت ته ځواب ور کوئ، نو تاسو لومړی له ملت سره په کوم کار کې مشوره کړې ده؟ ایا د یوې پروژې په اړه مو لومړی له ملت سره خبره شريکړه کړې ده؟ د ملت استازي په همدې تصمیم نیولو کې در سره دخیل وو؟ کوم کسان چې تاسو وزیران کړي دي، ایا د یوه په اړه مو هم د ملت رایه غوښتې ده؟ تاسو ملت ته د دې ځواب ور کړی دی چې ستاسو دوه کلن حکومت تر اوسه ولې سرپرست دی؟ په قانون کې دومره اوږده موده د سرپرست حکومت لپاره نه ده پیش بیني شوې، نو تاسو د کوم قانون له مخې دومره اوږده موده سرپرست حکومت ته ور کړه او کله به دا پای ته رسېږي؟
د واک په وېش کې مو د ملت سره مشوره کړې ده؟ د نجونو د تعلیم په اړه مو له ملت سره مشوره کړې ده؟ د ښځو د کار او زیار په اړه مو د ملت رایه اخیستې ده؟ دا ډېره غولوونکې پروسه ده، پښتانه متل کوي چې ویل يې زه دې کڼی نه اوبدم، ته وا ګز يې په څو دی!
تاسو د یوه مشروع دولت په توګه ملت منلي نه یاست، د مشروعیت لپاره مهم او اساسي ټکي شته چې که تاسو هغه عملي نه کړئ، نو هيڅ وخت به هم نه په کور دننه مشروعیت تر لاسه کړئ او نه به مو نړۍ په رسمیت وپېژني.
بله خبره دا ده چې تاسو ملت ته کوم حساب ور کوئ، هغه څومره پر حقیقت ولاړ دی؟ د بېلګې په توګه د دفاع وزارت ویلي دي چې په تېره دوه کلنه موده کې يې ۵۰ زره وسایط بیا رغولي دي، اوس نو پوښتنه دا ده چې هغه وسایط کوم دي؟ څومره بودجه د دې لپاره ځانګړې شوې وه؟ هغه بودجه ورته له کومه کېده؟ د دغه جوړ شوي وسایطو مکمل جزئیات دې خپاره کړي، د ټولو په اړه دې دا هم روښانه کړي چې که رسنۍ وغواړي، هغه وسایط په هر وخت کې لیدلای شي او د ټولو موقعیت دې هم په ډاګه کړي.
دا خو ملت ته حساب ور کول نه دي چې وزیر صاحب راشي کښېني، خبرې وکړي، څوک پوښتنه نه شي کولای، وضاحت نه شي غوښتلای، خبره ور سره اړولای نه شي، ټولې خبرې به وزیر کوي او هر څه به د حقیقت په توګه منل کېږي. دې ته تاسو حساب ور کول وایاست؟
د پاسپورت د ادارې په اړه به ملت پوښتنه وکړي چې د هغه مفسد رئیس علم ګل حقاني ورور له نجونو او شرابونو سره یو ځای ونیول شو، هغه څه شو؟ ایا په دغه جرم محکمې ته معرفي شو او سزا يې ولیده؟
دا اوس چې د پاسپورت په اداره کې کوم فساد روان دی، ایا په دې اړه ملت ته ځواب لرئ؟
د معارف په وزارت کې چې اووه سوه ورځې وشوې د مکاتبو دروازې نجونو ته بندې دي، ایا په دې اړه ملت ته ځواب لرئ، که یوازې تر امر ثاني پورې ځنډول مو ځواب دی؟
د لوړو زده کړو وزیر مو په دې اړه ځواب لري چې ولې د کانکور په اداره کې دا ځل څه د پاسه نوي زره کسانو ګډون کړی دی او دا شمېر به د جمهوریت په وخت کې دوه لکه کسانو ته رسېده؟
دا ځواب ورته لري چې د ښځو په وړاندې مو ولې د پوهنتونونو دروازې بندې کړې دي؟ دا هم چې ښځې به ولې په یو څو خاصو پوهنځیو کې تعلیم کولای شي، له دې پرته نور پوهنځي د هغوی لپاره ممنوع دي؟
دا اوس چې کوم کار طالبي اداره کوي، دا هم په ځان ریخشند وهل دي او هم په دې حساب ور کولو، که تاسو پر همدې کار باور لرئ، نو رسنیو ته ازادي ور کړئ، ولې مو خبریالان نیولي دي؟ سانسور مو ولې جوړ کړی دی؟ هر هغه څوک ولې زندان ته اچوئ چې ستاسو پر کړنو نیوکې وکړي؟ ایا هر هغه کس چې نیوکه لري، ستاسو او ستاسو د نظام دښمن دی او باید سزا ور کړل شي؟ که ستاسو همدا حکومتولي وي، نو بیا ملت حساب نه در څخه غواړي، ملت لاس په کار کېږي او تر څنګ يې دعا کونکی دی چې خدای مو وخت لنډوه چې نور زموږ خلک او د سیمې ولسونه مو له شره خلاص شي.